Уон күн биллибэккэ ааста

Дьокуускайга Көхтөөх уһун үйэлэнии киинин уочараттаах сезона түмүктэнэн эрэр. Манна аҕам саастаахтар доруобуйаларын көннөрүннүлэр, эдэрдии эрчими, саҥа иэйиини иҥэриннилэр.

Киин сэбиэдиссэйэ Вероника Макарова эппитинэн, муус устар 4—24 күннэригэр Дьокуускайдааҕы “Аврора” мэдиссиинэ килииньикэтин Көхтөөх уһун үйэлэнии киинигэр Дьокуускайтан эрэ буолбакка, хас да улуустан кэлэн сынньаннылар: Мэҥэ Хаҥаластан, Хаҥаластан, Намтан, Бүлүүттэн, Өлөөнтөн, Аллараа Халыматтан, Ньурбаттан. Кэлэр саҥа сезон ыам ыйын 4 күнүттэн саҕаланна.

Сынньалаҥ бырагыраамата, мэлдьи буоларын курдук, сүрдээх баай: ыалдьыттарбыт мэдиссиинэ толору көрүүтүн аастылар, култууранай тэрээһиннэргэ сырыттылар, Үрдэл-пааркаҕа тахсан сынньаннылар уонна “Сэргэлээх уоттара” култуура киинигэр Үһүс саас оскуолата тэрийбит аһымал кэнсиэрин астына-дуоһуйа көрдүлэр. Оттон саамай сүрүнэ – олоххо интэриэһи күүһүрдэргэ, көхтөөх олохтонорго төһүү буолар тыыннаах кэпсэтии, үөлээннээхтэрдиин алтыһыы.

“Аҕам саастаах дьон бэйэлэригэр бүгэн эрэ хаалымыахтарын наада. Куруук саҥаттан саҥаҕа үөрэнии, дьону кытары көрсүһүү, уопуту, эмоцияны үллэстии хайаан да наада. Оччоҕуна дууһа эдэрсийэр уонна доруобай, чөл сылдьаҕын”, - диэн киин исписэлиистэрэ бэлиэтииллэр.

Бу сырыыга ордук дьэрэкээн, умнуллубат түгэн Елена Николаевна Егорова идиэйэтинэн тэриллибит ретро-дефиле буолла. Дьахталлар, үөрэ-көтө эдэр саастарыгар муода буолбут былаачыйалары таҥнан, киэргэнэн хаамтылар. Маннык тэрээһиннэр настарыанньаны көтөҕөллөр эрэ буолбатах, кыттааччылары түмэллэр, доҕордуу холбоһук солбуллубат чааһа буолалларын итэҕэтэллэр.

Көхтөөх уһун үйэлэнии киинигэр, үгэс курдук, интэриэһинэй дьону кытары көрсүһүү, маастар-кылаас уонна кэнсиэр ыытыллар. Ити барыта саататыы эрэ буолбатах – көхтөөх уһун үйэлэниини өйүүр саамай наадалаах түгэн. Быраактыка көрдөрөрүнэн, куруук дьону кытары алтыһар, култуурунай олоххо көхтөөхтүк кыттар уонна саҥаны, сонуну билэр эр дьон уонна дьахталлар чөл өйдөрүн, толкуйдуур дьоҕурдарын тута сылдьаллар, эрчимнээх буолаллар уонна олоххо тардыһыылара күүһүрэр.

Билсэр нүөмэргит: Дьокуускайга – 89142710088, Булгунньахтаахха – 89148223874, Нерюнгрига – 89963154189.