Быраас көрөр бириэмэтин уһатарга туруорсаллар

Арассыыйаҕа быраастар ыарыһаҕы бастаан көрүүлэрин 15 мүнүүтэттэн 30 мүнүүтэҕэ диэри уһатарга туруорсубуттар. Ол курдук, дойду доруобуйа харыстабылын миниистиригэр итинник этиилээх “Сиэрдээх Арассыыйа” салайааччыта Сергей Миронов тахсыбыт.

Саха сиригэр ити сонуну араастык ылыннылар. “Сороҕор бырааска тугуҥ ыалдьарын ситэ кэпсии да иликкинэ ааҥҥа анньаллар. Үлэһит дьоҥҥо анаан киэһэтин быраас приёмнарын оҥороллоро буоллар, олус абыгастаах буолуо этэ. Сороҕор киһи үлэтигэр ыктаран, балыыһаҕа кыайан сылдьыбат үлүгэрэ буолар, инньэ гынан ыарыыны атаххар сылдьан аһараҕын эбэтэр дьарҕа ыарыыга кубулутаҕын”, - диир Дьокуускай олохтооҕо Мария Аммосова.

“Быраас ыарыһаҕы көрөр бириэмэтин уһаттахтарына, онто да суох каадыр тиийбэтин өссө дириҥэтиэ. Уһаттахтарына, өссө элбэх быраас ирдэниэҕэ”, “Бириэмэни буолбакка, быраас көрүүтүн көдьүүһүн улаатыннарыахха наада: автоматизация, аҕыйах отчуот, оҥоһуу өй туһаныллыахтаах”, - диэн сорох ааҕааччыларбыт санааларын үллэһиннилэр.

Оттон Ил Түмэн 6-с ыҥырыылаах мунньаҕын дьокутаата, “Аврора” мэдиссиинэ килииньикэтин дириэктэрин солбуйааччы Вера Никифорова чуолаан бастакы звено быраастарыгар дьон физическэй туруктара мөлтөөн эрэ буолбакка, ордук туохтан эрэ ыктарыбыт, куттаммыт уонна тугу да итэҕэйбэт буолбут дьон кэлэллэрин бэлиэтиир.

“Ол иһин биһиги быраастарбытыгар пациеннар эмоцияларыгар сөптөөх болҕомто ууралларын үөрэтэргэ кыһанабыт. Ол эрээри Арассыыйаҕа үйэ тухары быраас тиийбэтэ уонна наһаа улахан ноҕурууска баара сытыытык турар. Билиҥҥи нормативка учаскыабай тэрэпиэп – 15 мүнүүтэ, уопсай быраактыка бырааһыгар 18 мүнүүтэ көрүллэр. Ити кэм иһигэр кинилэр толору анамнеһы хомуйуохтаахтар, ыарыһаҕы көрүөхтээхтэр уонна туһааннаах чинчийиилэри, эмтэниини аныахтаахтар, профилактикаҕа консултаассыйа биэриэхтээхтэр. Биллэн турар, ити кыра кэмҥэ ону толору, сөпкө оҥорор уустук. Ол иһин биһиги быраастар ыарыһаҕы көрөр бириэмэлэрэ уһуурун сөптөөх хайысха диэн сыаналыыбыт – мэдиссиинэ көмөтүн тупсарыа уонна быраас сыыһарын аҕыйатыа”, - диэтэ Вера Никифорова.

Ону сэргэ, быраас бэлиэтииринэн, тэҥинэн доруобуйа харыстабылын бастакы звенотугар каадыр дэписсиитин кыһалҕатын быһаарыахтаахтар, оччоҕуна эрэ гражданнарга үрдүк таһымнаах мэдиссиинэ көмөтө оҥоһуллуоҕа. “Биһиги быраас приемун бырассыастарыгар оптимизацияҕа үлэлэһэбит – саҥа технологиялары киллэрэбит уонна быраастар таһымнарын үрдэтэбит. Оччоҕо эрэ баар ресурсабытын көдьүүстээхтик туһаныахпыт уонна ыарыһахтарга мэдиссиинэ көмөтүн бэркэ оҥоруохпут”, - диир кини.

Бу нүөмэрдэргэ эрийэн сиһилии Киини билсиҥ. Дьокуускайга үлэлиир филиал: 8914-271-00-88; Булгунньахтаах филиала: 8914-822-38-74, Нерюнгрига: 89963154189